លោក វិសិទ្ធ
-
ខេត្តតាកែវ ៖ លោក ឯម សុវណ្ណារ៉ា
ប្រធានមន្ទីរទេសចរណ៍ខេត្តតាកែវបានមានប្រសាសន៍ប្រាប់«ខ្មែរដេលី»ឲ្យដឹងថា ភ្នំជីតាពេជ្រជារមណីយដ្ឋានទេសចរណ៍ទើបនឹងរៀបចំថ្មីមានសោភ័ណភាពស្រស់បំព្រងនិងត្រូវបានប្រារព្ធធ្វើពិធីសម្ពោធដាក់ឲ្យប្រើប្រាស់កាលពី
ថ្ងៃទី៩ ខែកញ្ញា ឆ្នាំ២០១០
កន្លងទៅនេះក្រោមអធិបតីភាពដ៏ខ្ពង់ខ្ពស់បំផុតរបស់សម្តេចអគ្គមហាសេនាបតីតេជោហ៊ុនសែននាយករដ្ឋមន្ត្រីនៃព្រះរាជាណាចក្រកម្ពុជា។
ភ្នំជីតាពេជ្រមានទីតាំងស្ថិតនៅក្នុងភូមិ វត្តភ្នំ ឃុំកំពែង
ស្រុកគិរីវង់ ខេត្តតាកែវ
មានចម្ងាយ២៥គីឡូម៉ែត្រពីផ្លូវជាតិលេខ២ត្រង់ចំណុចវត្តឧទ្ទម្ពរខាងជើងផ្សារទន្លាប់១០០ម៉ែត្រឆ្ពោះទៅទិសខាងលិច
និង៦៥គីឡូម៉ែត្រពីក្រុងដូនកែវ។ រមណីយដ្ឋាននេះ ផ្តើមកសាងឡើងដោយឧបាសិកា
តាន់ វិចហុង ដោយចំណាយអស់ទឹកប្រាក់សរុបចំនួន៤៩៥ ០០០ដុល្លារសហរដ្ឋអាមេរិក
ចំណាយទៅលើការកសាងជណ្តើរបេតុងឡើងលើកំពូលភ្នំប្រវែង១៧០ម៉ែត្រស្មើនឹង២៤៣កាំ
សាលាដំណាក់ចំនួន៤ បន្ទប់អនាម័យ ព្រះពុទ្ធរូបអង្គតូច១ធ្វើអំពីថ្មភក់
រូបសំណាកតាបស១អង្គធ្វើពីថ្មភក់
និងរូបសំណាកព្រះពុទ្ធទ្រង់ឈរលើបល្ល័ង្កនៅលើកំពូល
ភ្នំកម្ពស់១៣.៥០ម៉ែត្រធ្វើអំពីថ្មភក់។
ភ្នំជីតាពេជ្រជាឈ្មោះ និងជាទីកន្លែងមួយដែលបច្ចុប្បន្នត្រូវបានគេស្គាល់ច្រើន
ក្នុងមជ្ឈដ្ឋានអ្នកចូលចិត្តដើរលេងកម្សាន្តតាមទីជិតឆ្ងាយពីព្រោះភ្នំជីតាពេជ្រគឺជា រមណីយដ្ឋានទេសចរណ៍ដែលទើបនឹង
បង្កើតឡើងរបស់ទឹកដីចំណាស់ខេត្តតាកែវ។
ពួកអ្នកដើរកម្សាន្តបាននិយាយពីភាពល្បីពីមាត់មួយទៅមាត់មួយជាហេតុនាំឲ្យអ្នកទេសចរចង់ដឹងអំពីស្ថានភាពទីតាំង
និងប្រវត្តិដើមភ្នំជីតាពេជ្រនេះឲ្យរឹតតែច្បាស់ព្រោះសម្រាប់អ្នកដែលពុំបានឃើញចង់ដឹងទាំងស្រុង
ចំណែកអ្នកស្គាល់ហើយ
រមែងមានចម្ងល់ពីប្រវត្តិដើមកំណើតទីតាំងនេះជាមិនខាន។
លោក ឯម សុវណ្ណារ៉ា ឲ្យដឹងថា
ភ្នំជីតាពេជ្រជាកូនភ្នំតូចដែលមានកម្ពស់៤០ម៉ែត្រ
កាលពីដើមមានព្រៃក្រាស់
និងដើមឈើធំៗដែលផ្តល់ជាជម្រកយ៉ាងកក់ក្តៅដល់ពពួកម្រឹគីម្រឹគា
បក្សាបក្សីផងទាំងឡាយរស់នៅតកូនតចៅរៀងរហូតមកដោយពុំសូវមានមនុស្សចូលទៅដល់ទីនោះឡើយ
លុះចំណេរក្រោយមកមានបុរសម្នាក់ឈ្មោះពេជ្រដែលទើបនឹងលាចាកសិក្ខាបទថ្មីៗតាម
គន្លងព្រះពុទ្ធសាសនា(ហៅជី)បានមករស់នៅជើងភ្នំនេះតែម្នាក់ឯងដើម្បីកាប់ឆ្ការព្រៃធ្វើចម្ការហើយក៏ប៉ិនប្រសប់ខាងព្យាបាលជំងឺគ្រប់ប្រភេទដោយផ្សំរុក្ខជាតិផ្សេងៗនៅទីនោះសម្រាប់ធ្វើជាឱសថយ៉ាងស័ក្តិសិទ្ធិក្នុងការជួយព្យាបាលអ្នកជំងឺ។
ក្នុងសម័យនោះតាពេជ្រមានដំណាក់តូចមួយនៅលើកំពូលភ្នំដែលនៅពេលមានគ្រោះអាសន្នអ្នកស្រុកនៅទីនោះតែងតែទៅលើកំពូលភ្នំដើម្បីពឹងឲ្យតាពេជ្រជួយព្យាបាល
និងបញ្ចៀសនូវគ្រោះចង្រៃទាំងពួងឲ្យវិនាសបាត់ទៅ។
ជានិច្ចកាលតាពេជ្រតែងតែអប់រំទូន្មានប្រៀនប្រដៅអ្នកស្រុកឲ្យប្រណិប័តន៍ប្រព្រឹត្តកុសលកម្មធ្វើទានរក្សាសីលឲ្យបានជាប្រចាំស្វែងរកសេចក្តីសុខរៀងៗខ្លួន។
លុះក្រោយមកទៀតបន្ទាប់ពី មរណភាពរបស់តាពេជ្រអ្នកស្រុកតែងតែប្រារព្ធធ្វើបុណ្យជាប្រចាំនៅលើកំពូលភ្នំ
ដើម្បីឧទ្ទិសមគ្គផលជូនដល់វិញ្ញាណក្ខន្ធរបស់តាពេជ្រ។
ក្រោយមកទៀតអ្នកស្រុកក៏បានហៅភ្នំនោះថា «ភ្នំជីតាពេជ្រ» រហូតមកដល់សព្វថ្ងៃនេះ។
ឆ្លងតាមការនិយាយរៀបរាប់ខាងលើ របស់លោក ឯម សុវណ្ណារ៉ា នៅពេលអ្នក
ទេសចរទាំងឡាយបានមកដល់
និងបានឡើងទៅកាន់កំពូលភ្នំហើយនោះគឺគេនឹងបានប្រទះឃើញសមិទ្ធផលមួយចំនួនប្រកបទៅដោយសោភ័ណភាព
ជាពិសេសរូបសំណាក់ព្រះពុទ្ធអង្គធំ និងឃើញមនុស្ស
ម្នាចូលអុជធូបបួងសួងសុំសេចក្តីសុខតាមការប៉ងប្រាថ្នារៀងៗខ្លួន
ព្រោះបារមីនៅទីភ្នំជីតាពេជ្រនេះស័ក្តិសិទ្ធិណាស់។
ក្នុងពេលនោះដែរភ្ញៀវទេសចរក៏មិនភ្លេចឡើយក្នុងការថតផ្តិតយករូបភាពសម្រាប់ទុកជាអនុស្សាវរីយ៍។
ប្រសិនបើយើងចោលភ្នែកក្រឡេកមើលសម្រស់ទេសភាពជុំវិញភ្នំវិញ
គឺរឹតតែស្រស់បំព្រងណាស់គយគន់ឃើញដើមឈើតូចធំប្រមូលផ្តុំដោយពណ៌បៃតងខ្ចី
វាលស្រែ និងលំនៅស្ថានរបស់អ្នកស្រុកប្រៀបបាននឹងផ្ទាំងគំនូរអីចឹងដែរ។
ភ្នំជីតាពេជ្រជាកន្លែងកម្សាន្តមួយដែលពោរពេញទៅដោយបរិយាកាសបរិសុទ្ធព្រមទាំងលោកអ្នកអាចទស្សនាឃើញនូវទិដ្ឋភាពធម្មជាតិដ៏ល្អប្រណីតនៃស្រុកគិរីវង់ទាំងមូលផងដែរ
ដែលអាចនិយាយបានថា ទីនេះគឺជាទីសម្រាប់សណ្តំមនោរម្មណ៍ភ្ញៀវទេសចរជាតិ
និងអន្តរជាតិឲ្យលង់លក់ទៅនឹងសភាវធម្មជាតិទាំងនោះ។
